Summary of Baba Ji's Blessings (Holi Sangat, 17-3-14, Delhi)

Sadh Sangat Ji Prem se kehna Dhan Nirankar Ji

1) Abhi aap sab jo ghadiyaan bita rahe hain, jo ki uplaksh toh Holi ke tyohaar ka hai, jo galiyon mohallon, gaon aur shehron mein rango ka istemaal karte hue manayi jaati hai, aap Bhakt bhi yahaan mil baithkar Holi mana rahe hain.

2) Dunyavi rangon se upar waali avastha Bhakto ki hoti hai. Naujwano ne kala ka sahara lekar Sadh Sangat ko khushi pradaan ki aur Bhakti, Prem aur Naam waale rang ko pragat kiya. Aaj bhi isi pehlu ko ujagar kiya gaya.

3) Holi ke tyohaar ke saath, itihaas ke pannno se Bhakt Prehlaad ka zikr aata hai. Bhakt jab Holi, Diwali ya Eid ki baat karte hain, chaahe vo Basant ki baat ho, toh har pehlu ko adhyatmikta ke saath jodte hain, ye Bhakton ke iss terminology ke apne hi maayne hote hain. Diwaal ke deep ki baat ho, toh Gyan ujaale ki baat kar dete hain, Eid ki baat ho toh, Deed sajan ki baat karte hain ki mann ki aankh aur chehre ki aankh, dono hi darshan karti rahe. Isi prakaar Holi par rango ki baat karte hain. BASANT ki baat ho, toh Bhakt maayne nikaalte hain ki agar vaastvikta mein BE-ANT ke saath naata juda rahega, iss BE-ANT ko visheshta dete hain, toh jeevan mein BASANT aa jaati hai aur agar isko hum ek taraf karke jeevan jeete hain, phir kehte hain ki BAS ANT samjho, phir jeevan jeete hue bhi ANT ho jaata hai.

4) Bhakt iss pehlu ko ujaagar karte hain ki ye tyohaar kewal khel tamaashe nahi hua karte hain, iske sath adhyaatmikta waale pehlu bhi jud sakte hain. Sansaar mein ye aarambh toh ye isi bhaav se hua tha, par samay beetate beetate ye kuch aur rang le gaye.

5) Dataar sabhi ko Bhakti ka rang pradaan kare. Kal Sunday Satsang mein bh Mahatmaon ne ye prarthnayein ki, ki kabhi bhi hamaare mann pe ye sansaar waala rang na chade. Abhi bhi darshaaya gaya ki jo sansaar ka rang chadta hai toh Vair, Nafrat, Ninda waale pehlu jud jaate hain, satkaar ka bhaav chala jaata hai, badon ki kadr karna chhod dete hain aur charon taraf vishelapan aa jaata hai.

6) Kayi arse pehle Mahatmaon ne ye geet likhe ki chamki-chamki-chamki kismat chamki re. Toh usmein ek pankti aati hai ki - 'Rang ratla e jogi e ik de rang chadaanda e, Chad-di e naam khumari e aisi bhung pilaanda e'. Toh iss prakar se rang, bhang aur Naam ki masti chadi rahe. Bhaktjano ko ye nasha chada rahe aur naam ka rang bhi chada rahe.

7) Dataar kirpa kare ki Gurmat ke anusaar sabhi iss jeevan ke safar ko tey karte chale jaayein. Kabir Ji ne bhi kaha ki jheeni-jheeni-jheeni chadariya. Sant yahi kehte hain ki ye rang chada hai, jo mool hai, Sant sada uss mool mein sthapit karte aayein hain iss Nirankar ka rang chadaakar, phir har aatma rangi jaati hai, har rang chad jaata hai. Isi praarthna ke saath daas ijazat chahta hai.

Sadh Sangat Ji Dhan Nirankar Ji